فلسطین کے مقبوضہ مغربی کنارے میں اسرائیلی فوج نے چھاپوں کے دوران معتدد فلسطینیوں کوحراست میں لے لیا ہے
دوسری جانب اسرائیلی ٹی وی کی رپورٹ کے مطابق نابلس شہرمیں ایک فلسطینی نوجوان نے اسرائیلی فوجی پر خنجر سے حملے کی کوشش کی تھی تاہم حملہ آور کو پکڑ کرنامعلوم مقام پر منتقل کر دیا گیا ہے۔
مرکز اطلاعات فلسطین کے نامہ نگار کے مطابق بدھ کے روز ایک اکیس سالہ فلسطینی وجدی ھانی شلبی کو اس وقت حراست میں لیا گیا جب وہ زعترہ کے مقام پر اسرائیلی فوج کے لگائے گئے ایک ناکے سے اپنے ساتھیوں کے ہمراہ گھر کی جانب جا رہا تھا۔
انسانی حقوق کی تنظیم”کلب برائے اسیران” کی فراہم کردہ اطلاعات کے مطابق صہیونی فوجیوں نےوجدی شلبی کو حراست میں لینے کے بعد فوجی چوکی ہی پر وحشیانہ تشدد کا نشانہ بنایا۔ اس دوران اس کے دو دیگر ساتھیوں کو بھی حراست میں رکھا گیا۔ ان کے پاس موجود موبائل اور نقدی بھی قبضے میں لے لی گئی۔ بعد ازاں فلسطینی نوجوان ھانی شلبی کو نامعلوم مقام کی طرف منتقل کر دیا گیا ہے۔
ایک عینی شاہد نے بتایا کہ نابلس میں زعترہ کے مقام پر فوجی چوکی کے صہیونی اہلکاروں اور تین فلسطینیوں کے درمیان اس وقت مڈ بھیڑ ہوگئی جب فلسطینی وہاں سے گذر رہے تھے۔ صہیونی فوج نے فلسطینی لڑکوں کے ساتھ بدتمیزی کی اور ان کی عریاں تلاشی لینے کی کوشش کی اس پر فلسطینی طیش میں آگے اور انہوں نے قابض فوجیوں کو برا بھلا کہا، جس پر صہیونی فوجیوں نے انہیں تشدد کا نشانہ بنایا۔
اسرائیلی ٹی وی کی رپورٹ کے مطابق زعترہ چوکی سے حراست میں لیے گئے ایک فلسطینی کے قبضے سے ایک پستول اور ایک خنجر ملا ہے۔ اس نے گرفتاری سے قبل ایک فوجی اہلکار پر خنجر سے حملے کی ناکام کوشش کی تھی جسے دیگر فوجیوں نے مل کر پکڑ لیا۔ بعد ازاں اسے اس کے دیگرساتھیوں سمیت تفتیش کے لیے نامعلوم مقام پر منتقل کر دیا گیا ہے۔
بشکریہ:مرکزاطلاعات فلسطین