فلسطین کے مقبوضہ مغربی کنارے کے جنوبی شہر الخلیل میں ایک ویران علاقے میں اسرائیلی فوج کی نصب کردہ بارودی سرنگ پھٹنے سے دو کم سن بچے شدید زخمی ہو گئے ہیں۔
مرکزاطلاعات فلسطین کے مطابق بارودی سرنگ کے دھماکے کا واقعہ جمعہ کے روز الخلیل کے جنوب مشرقی علاقے یطامیں "جنبہ” کے مقام پر اس وقت پیش آیا جب دو فلسطینی بچے وہاں کھیل رہے تھے۔
یطا میں عوامی مزاحمتی کمیٹی کے نگران حافظ الھزینی نے میڈیا کو بتایا کہ بارودی سرنگ کے دھماکے میں ایک گیارہ سالہ لوئی خلیل عیسی ربعی اور تیرہ سالہ اسلام احمد عیسیٰربعی زخمی ہو گئے۔ دونوں زخمی بچوں کو اسرائیلی فوجی سورکا اسپتال لے گئے جہاں ان کا علاج کیا جا رہا ہے۔
خیال رہے کہ مغربی کنارے میں آبادی سے دور کئی علاقوں میں اسرائیلی فوجیوں نے ان گنت بارودی سرنگین نصب کر رکھی ہیں، ان بارودی سرنگوں کے نتیجے میں اب تک کئی فلسطینی چرواہے اور دیگرشہری زخمی ہو چکےہیں۔
چند ہفتے قبل امریکی انسانی حقوق کی تنظیم نے انکشاف کیا تھا کہ اسرائیلی فوجیوں نےمقبوضہ مغربی کنارے اور شمالی فلسطین کے شہروں میں پانچ لاکھ بارودی سرنگیں نصب کررکھی ہیں، جو فلسطینیوں کے لیے ہروقت ان کے سر پر منڈلاتا ہوا خطرہ ہیں۔