مصر نے اسرائیلی فوج کی جانب سے فلسطینی مجلس قانون ساز کے اسپیکر ڈاکٹر عزیز دویک کی گرفتاری کی شدید مذمت کرتے ہوئے ان کی فوری رہائی کا مطالبہ کیا ہے۔
مرکزاطلاعات فلسطین کے مطابق مصری وزارت خارجہ کی جانب سے جاری ایک بیان میں کہا گیا ہے کہ انہیں فلسطینی اسپیکر ڈاکٹر دویک کی گرفتاری پر شدید تشویش ہے، ان کی گرفتاری کا قطعا کوئی جواز نہیں۔ اسرائیلی حکومت انہیں فوری طور پر رہا کرے۔
بیان میں بتایا گیا ہے کہ مصری وزیرخارجہ ڈاکٹر کامل عمر نے تل ابیب میں تعینات اپنے سفیر کے ذریعے صہیونی وزرات خارجہ کے نام ایک مراسلہ بھیجا ہے،جس میں ڈاکٹر عزیز دویک اور دیگر اراکین پارلیمنٹ کی گرفتاریوں کی شدید مذمت کی گئی ہے۔ بیان میں کہا گیا ہے کہ مغربی کنارے سے ڈاکٹر عزیز دویک اور ان کے دو ساتھیوں خالد الطافش اور عبدالجابرالفقاء جبکہ مقبوضہ بیت المقدس میں ریڈ کراس کے دفت رکے باہر دھرنا دیے اراکین پارلیمنٹ محمد طوطح اور خالد ابوعرفہ کی گرفتاری قابل مذمت اقدامات ہیں۔ اسرائیل فوری طور پر ان تمام اراکین کو جیلوں سے رہا کرے۔
ذرائع کے مطابق مصری وزیرخارجہ نے ڈاکٹر عزیز دویک اور دیگر اراکین کی گرفتاری پر حماس کی قیادت سے بھی رابطے کیے ہیں اور یہ یقین دلایا ہے کہ مصر فلسطینی اراکین قانون ساز کونسل کی رہائی کے لیے تمام ممکنہ اقدامات کرے گا۔
ذرائع کا کہنا ہے کہ قاہرہ نے تل ابیب کے نام جوخطوط ارسال کیے ہیں ان میں سخت ترین لہجہ اختیار کرتے ہوئے ڈاکٹرعزیز دویک کی گرفتاری کی شدید مذمت کی گئی ہے۔ مراسلے میں اسرائیل پر واضح کیا گیا ہے ڈاکٹر عزیز دویک کی گرفتاری فلسطینیوں کے درمیان مصالحت کی مصری کوششوں کو سبوتاژ کرنے کی سازش ہے اور مصر اس سازش کو کلی طور پر مسترد کرتا ہے۔