مصر نےجزیرہ نما سیناء کے شمالی علاقوں بالخصوص اسرائیلی سرحد کے ساتھ ملحقہ علاقوں میں سیکیورٹی اہلکاروں کی تعداد میں اضافہ کردیا ہے اور سرحد پر ہنگامی حالت کا نفاذ کر دیا گیا ہے۔ قاہرہ کی جانب سے سیناء میں سیکیورٹی میں تازہ اضافہ جمعہ کے روز اسرائیلی فوج اور مظاہرہن کے درمیان سرحد پرہونے والی ایک جھڑپ کے بعد کیا گیا ہے۔ اس جھڑپ میں ایک اسرائیلی فوجی اور تین حملہ آور ہلاک ہوگئے تھے۔
مرکز اطلاعات فلسطین کے نامہ نگار کے مطابق مصری سیکیورٹی حکام کا کہنا ہے کہ انہوں نے فلسطینی سرحد کے ساتھ رفح اور شیخ زوید کے مقامات پر فوج کی تعداد میں اضافہ کر دیا ہے۔ اس کےعلاوہ اسرائیل سے ملحقہ سرحد کے ساتھ سیکیورٹی فورسز کے اہلکاروں کا گشت بھی جاری ہے اور فوج کسی بھی ناخوشگوار واقعے سے نمٹنے کے لیے مصروف ہے۔
مصری سیکیورٹی ذرائع کاکہنا ہے کہ انہوں نے سرحد پرفوج کی تعداد میں اضافہ محض سرحدی سیکیورٹی کی بناء پرکیا ہے، کیونکہ اسرائیلی فوج اور مسلح افراد کے درمیان جھڑپ کے بعد امکان ہے کہ صہیونی فوج مشتہ جنگجوؤں کے تعاقب میں مصری حدود میں داخل ہوسکتے ہیں۔