اسلامی تحریک مزاحمت ۔ حماس نے الزام عائد کیا ہے کہ مصر کے ذرائع ابلاغ میں جاری تحریک حماس کے خلاف چلائی جانے والی تنقیدی مہم کے پیچھے فلسطینی اتھارٹی کا ہاتھ ہے۔ حماس کے سینئر رہنما نے دعوی کیا کہ ان کے پاس اس بات کو ثابت کرنے کے لیے دستاویزات بھی موجود ہیں۔
منگل کے روز سماجی روابط کی معروف ویب سائٹ ’’فیس بک‘‘ پر شائع اپنی ایک پوسٹ میں حماس کے سینئر رہنما صلاح بردویل نے کہا کہ ہمارے ہاتھ ایسی دستاویز لگی ہیں جن سے ثابت ہوتا ہے مصری ذرائع ابلاغ میں تواتر سے حماس کو ہدف تنقید بنانے اور اس کے خلاف پروپیگنڈا مہم دراصل فلسطینی اتھارٹی کے ایماء پر شروع کی گئی ہے۔
انہوں نے بتایا کہ ان دستاویز میں اتھارٹی کے ان عہدیداروں کے نام موجود ہیں جو جھوٹے بیانات بنا کر ذرائع ابلاغ کے لیے جاری کرتے رہے۔ بردویل نے کہا کہ مفاہمت اور مصالحتی معاہدوں کے باوجود فلسطینی اتھارٹی یہ کر رہی ہے تو اسرائیل کا کیا کہنا؟
خیال رہے کہ گزشتہ دنوں مصری ذرائع ابلاغ کی جانب سے حماس کے خلاف تنقیدی مہم تیز کردی گئی ہے بعض ذرائع ابلاغ کی جانب سے الزام بھی عائد کیا گیا تھا کہ حماس نے مصری صدر محمد مرسی کی مدد کے لیے ہزاروں مسلح افراد مصر میں داخل کردیے ہیں، تاہم دوسری جانب حماس نے مصر کے معاملات میں کسی بھی طرح کی مداخلت کی بھرپور تردید کی ہے۔
بشکریہ:مرکز اطلاعات فلسطین