اردن کی معروف شخصیات کی کونسل نے یہودی آباد کاروں کی جانب سے قبلہ اول پر حملوں کے سلسلے کو کڑی تنقید کا نشانہ بناتے ہوئے
عرب اور اسلامی دنیا کے ساتھ ساتھ اقوام متحدہ سے بھی اپیل کی ہے کہ وہ انتہاء پسند یہودیوں کو مسجد اقصی میں داخل ہونے سے روکنے کے لیے فوری مداخلت کریں۔
اردنی کونسل کے سربراہ ڈاکٹر احمد عرموطی نے بدھ کی شام اپنے بیان میں کہا کہ اسرائیلی سکیورٹی اہلکاروں کی حفاظت میں یہودی آباد کاروں کی جانب سے مسجد اقصی کی بے حرمتی پر تمام مسلمانوں کے جذبات مجروح ہوتے ہیں۔ انہوں نے خبردار کرتے ہوئے کہا کہ اس اتوار کو بھی یہودی آباد کاروں نے ھیکل سلیمانی کی تباہی کی یاد میں مسجد اقصی پر دھاوے کا پروگرام تشکیل دے رکھا ہے۔ انہوں نے کہا کہ اسرائیلی حکومت کی سرپرستی میں یہودی تنظیموں کو مسلمانوں کے اس تیسرے مقدس ترین مقام کی بے حرمتی سے روکنا ہوگا۔
ڈاکٹر احمد عرموطی نے اردن کی حکومت سے بھی مطالبہ کیا کہ وہ مسجد اقصی کی حفاظت اور اسے باربار کے یہودی حملوں سے بچانے کے لیے مزید جدوجہد کرے۔ انہوں نے اقوام متحدہ اور عرب لیگ سے اپیل کی کہ یہودیوں کی جانب سے مسجد اقصی پر حملوں کا سلسلہ روکنے کے لیے ٹھوس اقدامات کیے جائیں۔ ان کا کہنا تھا کہ غاصب یہودیوں کے مسجد اقصی پر حملوں میں تیزی اور اسرائیلی حکومت کی بھرپور سرپرستی سے واضح ہوگیا ہے کہ صہیونی ریاست القدس کو یہودی رنگ میں رنگنے کی اقدامات میں تیزی لے آئی ہے۔
بشکریہ: مرکز اطلاعات فلسطین