مقبوضہ بیت المقدس میں قبلہ اول کے خلاف اسرائیلی ریشہ دوانیوں اور دھاوں پر نظر رکھنے کے قائم فاؤنڈیشن نے خبردار کیا ہے کہ مسجد اقصی کے قریب واقع یہودی آباد کاروں کے گھر انتہائی خطرناک ہیں۔ فاؤنڈیشن کے مطابق انتہاء پسند یہودی ان گھروں کی چھتوں سے مسجد اقصی میں داخل ہونے کی کوشش کر سکتے ہیں۔
اقصی فاؤنڈیشن برائے وقف و آثار قدیمہ کے ذرائع ابلاغ کو دیے گئے بیان میں کہا گیا ہے کہ یہودی آباد کار ہفتے کی شام مسجد اقصی کے مطھرہ دروازے تک پہنچنے میں کامیاب ہوگئے تھے اور یہ علاقہ مسجد اقصی کی حدود میں آتا ہے۔ مسجد اقصی کے علاقے تک یہودیوں کی رسائی انتہائی خطرناک ہے۔ ان حالات میں جب یہودیوں کو مسجد اقصی میں داخل ہونے کی بھرپور ترغیب دی جارہی ہے یہودی آباد کاروں کی بڑی تعداد مسجد اقصی کے ایک دروازے السلسلہ کے قریب یہودی مذہبی اسکول میں اکٹھے ہوگئے تھے۔
خیال رہے کہ تین یہودی آباد کار مطھرہ دروازے کے قریب پہنچ گئے تھے جنہیں مسجد اقصی کے گارڈز نے مسجد میں داخل ہونے سے روک دیا تھا۔ عینی شاہدین نے بتایا کہ مسجد اقصی پر حملہ کرنے والے ان یہودی آباد کاروں نے السلسلہ دروازے کے علاقے میں گھروں کی چھتوں کے ذریعے یہاں تک رسائی حاصل کی تھی۔
بشکریہ:مرکزاطلاعات فلسطین