مرکزاطلاعات فلسطین کے مطابق اقصیٰ فائونڈیشن کی جانب سے جاری ایک بیان میں بتایا گیا ہے کہ قابض صہیونی حکومت نے سنہ 1969 ء میں مدرستہ التنکزیہ کا ایک حصہ صہیونی فوج کو دے دیا تھا اور باقی ماندہ حصے کو محکمہ آثار قدیمہ کے سپرد کرنے کی سازش کی گئی تھی۔ اب اسے یہودی معبد کے لیے استعمال میں لانے کا فیصلہ کیا گیا ہے۔
بیان میں بتایا گیا ہے کہ قبلہ اول سے متصل تاریخی مدرسے کی عمارت کو یہودی معبد میں منتقل کرنے کی سازش میں کئی انتہا پسند یہودی تنظیمیں پیش پیش ہیں۔ ان میں خاص طورپر مسجد اقصیٰ کی جگہ ہیکل سلیمانی کی تعمیرکی سازشیں کرنے والے گروپ خاص طورپرشامل ہیں۔
بیان کے مطابق مزعومہ ہیکل سلیمانی کی تعمیر کے لیے سرگرم ’کل جماعتی اتحاد‘ کے سربراہ ’’افیعاد ویسلی‘‘ نے بیت المقدس کے پولیس چیف کوایک مکتوب ارسال کیا ہے جس میں ان سے کہا گیا ہے کہ وہ یہودی آباد کاروں کو عبادت کی غرض سے مدرسہ التنکزیہ میں داخل ہونے اور تلمودی تعلیمات کے مطابق مذہبی رسومات ادا کرنے کی اجازت فراہم کریں۔
اسرائیلی اخبار’’ہارٹز‘‘ کے مطابق مسٹر ویسلی نے خط میں دھمکی آزمیز لہجہ اختیار کیا ہے اور مکتوب کا آج منگل تک جواب دینے کی مہلت دیتے ہوئے کہا ہے کہ اگر پولیس نے اجازت نہ دی تو یہودی آباد کار خود ہی مدرستہ التنکزیہ میں داخل ہوجائیں گے۔
یہودی ربی کا کہنا ہے کہ ’’ہیکل سلیمانی ‘‘ کے اندرونی حصے میں مدرسہ التنکزیہ ہی واحد وہ جگہ ہے جہاں پرعبادت کے لیے یہودیوں کو جگہ دی جاسکتی ہے۔ یہ جگہ یہود کے لیے تاریخی اہمیت کی حامل ہے اور یہاں پر ایک یہودی معبد کی تعمیر کے سوا اور کوئی چارہ باقی نہیں رہا ہے۔
اقصیٰ فائونڈیشن نے یہودیوں کی اس گھنائونی سازش پرخبردار کرتےہوئے کہا ہے کہ مسجد اقصیٰ سے متصل مدرسے کو یہودی معبد میں تبدیل کرنا قبلہ اول کو یہودیت میں تبدیل کرنے کی سازش ہے۔ بیان میں عالم اسلام سے اپیل کی گئی ہے کہ وہ قبلہ اول کے دفاع کے لیے موثراقدامات کریں اور یہودی انتہا پسندوں کو فلسطین کے مقدس مقامات پر دست درازی سے روکیں۔
بشکریہ:مرکزاطلاعات فلسطین