مرکزاطلاعات فلسطین کے مطابق منگل کے روز سیکڑوں یہودی آباد کاروں نے یطا کے تفریحی مقام ’’الکرمل‘‘ پر دھاوا بولا۔ اس موقع پر یہودی فوجیوں کی بڑی تعداد نے انہیں اپنے گھیرے میں لے رکھا تھا۔ صہیونی فوجی یہودی آباد کاروں کی سیکیورٹی کے لیے فلسطینی شہریوں کے مکانوں کی چھتوں پر چڑھ گئے۔ یہودی آباد کار مسلح ہوکرکئےگھنٹے الکرمل میں گھومتے اور تلمودی تعلیمات کے مطابق مذہبی رسومات ادا کرتے رہے ہیں۔
مقامی فلسطینی سماجی کارکن اور اسرائیلی توسیع پسندی کے خلاف سرگرم عوامی مزاحمتی کمیٹی کے سربراہ راتب الجبور نے بتایا کہ الکرمل قصبے پریلغار کرنے والے یہودی آباد کار قریب ہی واقع یہودی کالونیوں ماعون، کرمئیل، حفات یئیر، سوسیا، مزبی یائیر، حفات ماعون، افیگال اور بیت یتیر سے آئے تھے۔ انہوں نے الکرمل میں واقع پارک اور تالاب پربھی دھاوا بولا اوردیر تک تالاب میں نہاتے رہے۔
عینی شاہدین نے بتایا کہ یہودی آباد کاروں کے دھاوے کےبعد اسرائیلی فوج نے الکرمل کےتمام داخلی اور خارجی راستے بند کردیے تھے جس کےنتیجے میں مقامی شہریوں کو شدید مشکلات کا سامنا کرنا پڑا۔
بشکریہ:مرکزاطلاعات فلسطین