عرب ملک تیونس کی حکمران جماعت اور ملک کی سب سے بڑی مذہبی سیاسی پارٹی تحریک النہضہ نے ایک مرتبہ پھر فلسطینیوں کی کھل کرحمایت کا اظہار کیا ہے۔
النہضہ کا کہنا ہے کہ فلسطینیوں کے لیے آزاد وطن کی خاطر وہ طرح سے تعاون اور مدد کے لیے تیارہیں۔
مرکز اطلاعات فلسطین کے مطابق النہضہ کی جانب سے جاری ایک بیان میں کہا گیا ہے کہ جماعت کوفلسطینی جماعتوں کے درمیان پائے جانے والے اختلافات پر سخت تشویش ہے۔ یہی وجہ ہے کہ النہضہ فلسطینیوں کو آپس میں متحد ہونے کے لیے باربار زور دیتی رہی ہے۔ آج بھی فلسطینی عوام کی سب سے بڑی ضرورت قوم کے نمائندہ دھڑوں کے درمیان پائے جانے والے اختلافات کو ختم کر کے انہیں ایک صف میں کھڑا کرنا ہے۔
بیان میں کہا گیا کہ جب تک فلسطینی آپس میں متحد نہیں ہو جاتے اسرائیل ان کے حقوق پر ڈاکے ڈالتا رہے گا۔
النہضہ نے فلسطین میں یوم الارض کی مناسبت سےجاری ایک بیان میں کہا ہے کہ القدس اور مسئلہ فلسطین کی حمایت تیونسی قوم کی بڑی ذمہ داری ہے اور وہ اس ذمہ داری کو احسن طریقے سے نبھانے کی پوری کوشش کریں گے۔
تیونس کی حکمران جماعت نے اسرائیلی جیلوں میں بھوک ہڑتال اسیران بالخصوص ھناء شلبی اور دیگرانتظامی حراست میں رکھے گئے اسیران کے ساتھ مکمل یکجہتی کا اظہار کیا۔ النہضہ نے اسرائیلی حکومت سے مطالبہ کیا کہ وہ ھناء شلبی کو فوری طور پر رہا کر دے۔
بشکریہ: مرکز اطلاعات فلسطین