فلسطین کے مقبوضہ مغربی کنارے میں جمعہ کے روز فلسطینی مظاہرین کے دو الگ الگ حملوں میں کم سے کم دو اسرائیلی فوجی زخمی ہو گئے۔
اسرائیلی ٹی وی 10کی رپورٹ کے مطابق جمعہ کے روز جنوبی نابلس میں "براکھا” یہودی کالونی کے قریب فلسطینی مظاہرین کی سنگ باری سے ایک فوجی زخمی ہو گیا۔ عینی شاہدین مطابق ایک فلسطینی نوجوان کی جانب سے پھینکا گیا پتھر فوجی کی سر میں جالگا جس کے نتیجے میں اس کے سرسے خون کافوارا پھوٹ پڑا۔ زخمی فوجی کو فوری طورپر مرہم پٹی کی گئی جسے بعد ازاں جیپ میں فوجی چوکی میں لے جایا گیا ہے۔صہیونی ٹی وی کی رپورٹ کے مطابق جنوبی نابلس میں اسرائیلی فوجیوں اور مظاہرین کے درمیان کئی گھنٹے تک آنکھ مچولی جاری رہی۔ اس دوران ایک فلسطینی کے حملے میں اسرائیلی فوج کا ایک سپاہی سر میں پتھر لگنے سے زخمی ہوا، جسے بیت تکفا میں "بیلنسون” اسپتال منتقل کر دیا گیا ہے۔
درایں اثناء مغربی کنارے میں رام اللہ کے قریب سلواد کے مقام پر فلسطینیوں کی ایک ریلی پر اسرائیلی فوج نے لاٹھی چارج کیا۔ اس دوران فلسطینی مظاہرین کی جانب سے پھینکا گیا ایک پتھر ایک صہیونی فوجی کے سر سے جا ٹکرایا جس کے نتیجے میں وہ شدید زخمی ہو گیا۔ زخمی فوجی کو فوری طورپر جیپ میں واپس لے جایا گیا ہے۔