فلسطین کے مقبوضہ مغربی کنارے کے شہر رام اللہ کے نواحی علاقے سلواد میں جمعہ کے روز فلسطینی شہریوں کی ایک احتجاجی ریلی پر قابض صہیونی فوجیوں نے فائرنگ کی ہے جس کے نتیجے میں کم سے کم چار افراد زخمی ہوگئے ہیں۔
عینی شاہدین نے مرکز اطلاعات فلسطین کو بتایا کہ جمعہ کے روز سلواد میں مقامی شہریوں نے دیوار فاصل اور یہودی توسیع پسندی کے خلاف ہفتہ وار احتجاجی جلوس نکالا۔ قابض فوج نے مظاہرین کو منتشر کرنے کے لیے ان پر لاٹھی چارج کیا جس کے جواب میں مظاہرین نے قابض فوج پر پتھراؤ کیا۔
عینی شاہدین نے بتایا کہ صہیونی فوج نے مظاہرین کو منتشر کرنے کے لیے ان پر آنسو گیس کے شیلنگ کی اور ربڑ کی گولیوں کااستعمال کیا جس کے نتیجے میں کم سے کم چار افراد زخمی ہوگئے ہیں۔
زخمیوں کو رام اللہ میں ایک اسپتال میں منتقل کیا گیا ہے جہاں ان کی حالت خطرے سے باہر بتائی جاتی ہے۔