قابض اسرائیلی فوج نے فلسطین کے مقبوضہ مغربی کنارے کے جنوبی شہر الخلیل کے شمال میں بیت امر کے مقام پر مشتعل فلسطینی مظاہرین کی ایک ریلی پر طاقت کا اندھا دھند استعمال کیا جس کے نتیجے میں متعدد افراد زخمی ہوئے ہیں۔
مرکز اطلاعات فلسطین کے مطابق مقامی سماجی کارکن محمد عوض نے بتایا کہ قابض فوجیوں اور پولیس نے مظاہرین پر دھاتی گولیوں کا اندھا دھند استعمال کیا جس کے نتیجے میں متعدد افراد زخمی ہوگئے۔
انہوں نے بتایا کہ صہیونی فوج اور فلسطینیوں کے درمیان اس وقت کشیدگی پیدا ہوئی جب پرامن مظاہرین پر اسرائیلی فوج نے آنسو گیس کی شیلنگ شروع کردی۔ اشک آور گیس کی شیلنگ اور دھاتی گولیوں کے استعمال کے باعث درجنوں افراد زخمی ہوگئے جنہیں بعد ازاں ہلال احمر کی امدادی طبی ٹیموں کی جانب سے فوری طور پر طبی امداد فراہم کی گئی تھی۔