فلسطین کے مقبوضہ مغربی کنارے کی مساجد میں کل جمعہ کے روز اسرائیلی جیلوں میں زیرحراست فلسطینی بھوک ہڑتالی قیدیوں کے ساتھ مکمل یکجہتی اور ہمدردی کا اظہار کرتے ہوئے فلسطینی عوام سے اسیران کی نصرت کے لیے قومی سطح کی سرگرمیوں میں بڑھ چڑھ کرحصہ لینے کا بھی مطالبہ کیا۔
مرکزاطلاعات فلسطین کے مطابق جمعہ کے روز مغربی کنارے کی تمام مساجد میں علماء اور آئمہ کی جانب سے بھوک ہڑتالی اسیران کی حمایت اور اسرائیلی ریاستی دہشت گردی کے خلاف قراردادیں منظور کی گئیں۔ علماء نے عوام الناس سے اپیل کی کہ وہ پابند سلاسل اپنے بھوک ہڑتالی بھائیوں کی مدد کے لیے جلسے جلوسوں اور دیگر تقریبات میں بڑھ چڑھ کرحصہ لیں۔
علماء اور آئمہ مساجد نے اسرائیلی فوج اور حکومت پر کڑی تنقید کرتے ہوئے کہا کہ اسرائیل ایک سازش کے تحت فلسطینی قیدیوں پر مظالم ڈھا رہا ہے تاکہ وہ حق اور آزادی کا مطالبہ ترک کرتے ہوئے صہیونی دشمن کا جبر قبول کر لیں۔ علماء نے اسرائیلی جیلوں میں انتظامی حراست میں رکھے گئے تمام اسیران کی فوری رہائی کا بھی مطالبہ کیا۔
بشکریہ:مرکزاطلاعات فلسطین