(فلسطین نیوز۔مرکز اطلاعات) فلسطینی اتھارٹی کی ایک ماتحت عدالت نے الاقصیٰ ٹی وی چینل کے زیرحراست نامہ نگار کی رہائی کے لیے دی گئی درخواست مسلسل ساتویں مرتبہ مسترد کرتے ہوئے عدالتی آمریت کا مظاہرہ کیا گیا ہے۔
فلسطین نیوز کو موصول ہونے والی اطلاعات کے مطابق مقبوضہ مغربی کنارے کے شمالی شہر نابلس میں قائم فلسطینی عدالت نے کل سوموار کے روز اپنے ایک فیصلے میں زیرحراست صحافی طارق ابو زید کی ضمانت پر رہائی کے لیے دی گئی درخواست مسترد کر دی۔مقامی ذرائع نے بتایا کہ صحافی ابو زید کے وکیل نے عدالت میں ایک درخواست دی تھی جس میں عدالت سے استدعا کی گئی تھی کہ وہ ماہ صیام کے دوران صحافی طارق ابو زید کو ضمانت پر رہا کرنے کا حکم دے تاہم عدالت نے درخواست مسترد کردی۔ اس سے قبل بھی چھ مرتبہ ابو زید کی ضمانت پر رہائی کی درخواست مسترد کی جا چکی ہے۔
خیال رہے کہ فلسطینی اتھارٹی کی پولیس نے صحافی ابو زید کو 17 مئی کو حراست میں لیا تھا۔ اس پر فلسطینی اتھارٹی کے خلاف من گھڑت خبریں نشر کرانے کا الزام عائد کیا گیا تھا۔