اسرائیلی حکام نے فلسطین کے مقبوضہ مغربی کنارے کے شہر بیت لحم سے تعلق رکھنے والے شہری طہ شحادہ الوحش کو پندرہ سال کی مسلسل قید کے بعد رہا کر دیا ہے۔ رہائی پانے والے فلسطینی شہری کا تعلق بیت لحم کے جنوب مشرق میں الزعترہ کالونی سے ہے جہاں اتوار کے روز شحادہ کی رہائی کے بعد آمد پر شاندار استقبال کیا گیا۔
مرکزاطلاعات فلسطین کے مطابق صہیونی جیل حکام نے فلسطینی شہری طہ کو رہائی کے بعد جبل الخلیل میں‘‘میتار’’ فوجی چوکی کے قریب سے جیپ سے اتار کر ان کے گھر کے لیے روانہ کیا۔ جہاں اس کے اہل خانہ اور اقارب کی بڑی تعداد بھی موجود تھی۔
خیال رہے کہ طہ شحادہ نے مجموعی طور پر صہیونی جیل میں سترہ سال قید کاٹی ہے۔ انہیں پہلی مرتبہ 1988ء میں حراست میں لیا گیا تھا۔ تاہم ڈیڑھ سال کی قید کے بعد رہا کردیا گیا تھا۔ بعد ازاں سنہ 1994ء کو انہیں دوبارہ حراست میں لے لیا گیا۔ ان پر حماس کے عسکری بازو عزالدین القسام بریگیڈ سے تعلق کا الزام عائد کیا گیا اور اسی الزام کے تحت انہیں پندرہ سال قید بامشقت میں ڈالا گیا ہے۔
بشکریہ: مرکز اطلاعات فلسطین