اسرائیلی ریڈیو پر صہیونی پولیس کی جانب سے جاری ایک بیان میں بتایا گیا ہے کہ فلسطینی شہریوں کے ایک نقاب پوش گروپ نے مشرقی بیت المقدس میں النبی یعقوب کے مقام پر ایک اسرائیلی بس پرحملہ کیا جس کے نتیجے میں بس کو بری طرح نقصان پہنچا ہے۔ تاہم اس کے نتیجے میں کسی قسم کا جانی نقصان نہیں ہوا۔
صہیونی پولیس کا کہنا ہے کہ فلسطینی شہریوں کی جانب سے بس پرحملے کےبعد حکام نے مشتبہ افراد کی تلاش شروع کردی ہے۔ بس پر سنگ باری میں ملوث فلسطینیوں کی شناخت کے بعد ان کی تلاش کا سلسلہ جاری ہے تاہم ابھی تک کسی شخص کو حراست میں نہیں لیا گیا ہے۔
پولیس کے ایک دوسرے بیان میں بتایا گیا ہے کہ فلسطینی شہریوں کی جانب سے مشرقی بیت المقدس میں ایک تیز رفتار ریل کارپربھی سنگ باری کی گئی ہے جس کے نتیجے میں ریل کے شیشے ٹوٹ گئے۔
خیال رہے کہ اسرائیلی پارلیمنٹ نے حال ہی میں ایک مسودہ قانون کی منظوری دی ہے جس میں یہودی املاک پر سنگ باری کرنے والے فلسطینیوں کو کم سےکم 10 سال قید اور بھاری جرمانوں کی سزا کی سفارش کی گئی ہے۔ حال ہی میں اسرائیلی وزیراعظم بنجمن نیتن یاھو نے بیت المقدس میں سنگ باری کے بڑھتے واقعات کے بعد شہر میں مزید 400 پولیس اہلکار تعینات کرنے کا حکم دیا تھا۔