اسرائیلی جارحیت میں شہید ہونے والے غزہ کے فلسطینیوں کے بچوں کا وفد ان دنوں قطر کے دورے پر ہے۔ امیر قطر شیخ حمد بن خلیفہ آل ثانی کی دعوت پر قطر آنے والے اس وفد نے دوحہ میں اسلامی عجائب گھر کا دورہ کیا۔
اس موقع پر بچوں کے وفد کی ترجمانی کرتے ہوئے فلسطینی بچی حنان الدحدوح نےامیر قطر شیخ حمد بن آل ثانی اور شیخہ موزا اور فلسطینیوں کے زخموں پر مرہم رکھنے والے ہر فرد کا شکریہ ادا کیا۔
فسطینی بچی الدحدوح نے اہل غزہ اور بچوں کے اس وفد کے لیے قطر کے دورے کے اہتمام کرنے والے منتظمین کو بھی سلام پیش کیا۔ وفد میں شامل بچے دورے کے اگلے مرحلے میں عمرہ کی سعادت حاصل کریں گے۔
وفد کی ایک اور بچی جمیلہ الھباش کا کہنا تھا کہ وہ اس وقت غزہ کی پٹی میں اسرائیلی مظالم کے ستائے فلسطینیوں کی ترجمانی کر رہی ہیں اور قطر کی حکومت اور قوم کا شکریہ ادا کرتی ہیں جنہوں نے ہماری بہترین میزبانی کی ہے۔ الھباش نے عرب دنیا کے تمام ممالک سے اپیل کی کہ وہ بھی قطر کے نقش قدم پر چلتے ہوئے اسرائیلی غارت گریوں میں شہید ہونے والے فلسطینیوں کے بچوں کے لیے پروگرام شروع کریں۔
فلسطینی نونہال بچی نے عالمی برادری اور انسانی حقوق کی بین الاقوامی تنظیموں سے غزہ کی پٹی میں انسانیت سوز مظالم کرنے والے اسرائیل کو لگام دینے کی اپیل کی، فلسطینی بچوں کے وفد نے دوحہ کے سیاحتی اور تجارتی مقامات کی سیر کی اور اپنے پیاروں کے لیے تحفے تحائف بھی خریدے۔
بشکریہ:مرکز اطلاعات فلسطین