فلسطین کے مقبوضہ مغربی کنارے میں اسرائیل کے خلاف بڑھتے مزاحمتی حملے اور تحریک آزادی میں شدت آتے ہی اسرائیل کے عسکری اور سیاسی حلقوں میں سخت بے چینی پائی جا رہی ہے۔
اسرائیلی وزیردفاع موشے یعلون نےتسلیم کیا ہے کہ مغربی کنارے میں صورت حال ایک آتش فشاں کی طرح پھٹ رہی ہے جو کسی بھی وقت بڑے دھماکے سے تباہی پھیلا سکتی ہے۔
عبرانی اخبار”یدیعوت احرونوت” کی رپورٹ کے مطابق موشے یعلون نے مغربی کنارے میں یہودی کالونیوں کے دورے کے دوران یہودی آباد کاروں سے گفتگو کرتےہوئے کہا کہ ہماری مسلح افواج کو مغربی کنارے میں سخت چیلنجز کا سامنا ہے۔ حالیہ چند ماہ کے دوران مغربی کنارے میں اسرائیل مخالف سرگرمیوں کے بڑھتے واقعات نے ہمیں سخت پریشان کررکھا ہے۔ ہم ان تمام کارروائیوں کو جرائم اور دہشت گردی سمجھتے ہیں اور ان پر خاموشی کا کوئی جواز نہیں ہے۔
صہیونی وزیردفاع کا کہنا تھا کہ مجھے فلسطین میں تیسری تحریک انتفاضہ کا خطرہ محسوس نہیں ہو رہا ہے لیکن ہمیں اپنے سیکیورٹی اداروں کو ہرطرح کے حالات کا سامنا کرنے کے لیے تیار کرنا ہوگا۔ اگر فلسطین میں ایسی کوئی تحریک سر اٹھاتی ہے تو اسے آغازسے ہی ختم کردینا چاہیے۔
بشکریہ:مرکزاطلاعات فلسطین