اسرائیلی فوج نے فلسطین کے مقبوضہ مغربی کنارے کے علاقے "الخلیل” میں فلسطینی شہریوں کی نکالی گئی ایک احتجاجی ریلی پر حملہ کر کے درجنوں افراد زخمی کر دیے ہیں۔ یہ احتجاجی ریلی شہر میں جاری صہیونی غنڈہ گردی اور فلسطینیوں کے املاک پر قبضے کے خلاف نکالی گئی تھی۔
مرکز اطلاعات فلسطین کے مطابق اتوار کے روز فلسطینی شہریوں کی بڑی تعداد مغربی کنارے کے جنوبی شہر الخلیل میں "الرجبی” ہاؤس کے سامنے جمع ہوئی اور صہیونی فوج اور ریاستی دہشت گردی کے خلاف نعرے بازی شروع کی۔
مظاہرین "الرجبی” ہاؤس پر یہودی غنڈوں کا قبضہ ختم کرنے کا مطالبہ کر رہے تھے۔ خیال رہے کہ سنہ 2008ء میں یہودی آباد کاروں نے الخلیل میں الرجبی خاندان کے مکان اور اس سے متصل 3000 مربع میٹر اراضی پر قبضہ کرتے ہوئے گھر میں موجود لوگوں کو وہاں سے نکال دیا گیا تھا۔ فلسطینی شہری اس دن سےآج تک صہیونی غنڈہ گردی کے خلاف سراپا احتجاج ہیں۔
اس سلسلے میں فلسطینی شہریوں نے صہیونی سپریم کورٹ میں الرجبی خاندان کے مکان پر ناجائز قبضے کے خلاف درخواست بھی دائر کر رکھی ہے۔ آئندہ مہینے اس درخواست پر فیصلہ متوقع ہے، تاہم فلسطینی شہری اپنا احتجاج جاری رکھے ہوئے ہیں۔
گذشتہ روز احتجاجی مظاہرین پر صہیونی فوج نے طاقت کا وحشیانہ استعمال کر کے درجنوں افراد کو زخمی کر دیا۔ مظاہرین کو منتشر کرنے کے لیے ان پر لاٹھی چارج کیا گیا۔ اشک آور گیس کے گولے داغے گئے اور ربڑ کی گولیاں چلائیں ، جن کی زد میں آکر کئی افراد زخمی ہو گئے۔
بشکریہ:مرکزاطلاعات فلسطین