مرکز اطلاعات فلسطین کے مطابق حماس کے رہ نما حسام بدران نے الزام عاید کیا کہ فلسطینی اتھارٹی، وزیراعظم رامی الحمد اللہ کی حکومت اور تحریک الفتح غرب اردن میں سیاسی رہ نمائوں کو ہراساں کرنے اور ان کے اغواء کے واقعات میں ملوث ہے۔
انہوں نے کہا کہ مغربی کنارے میں پچھلے کچھ دنوں کے دوران حماس کے کئی رہ نمائوں اور کارکنوں کے اغواء کی کوشش کی گئی۔ اس طرح کے تمام واقعات حکومت کی غفلت اور فلسطینی اتھارٹی کی سازش کےتحت ہو رہے ہیں۔
حماس رہ نما نے کہا کہ مغربی کنارے میں سیاسی رہ نمائوں کو اغوا کرنے اور انہیں ہراساں کرنے کا رحجان نہایت خطرناک ہے۔ فلسطینی حکومت ایسے واقعات پر آنکھیں بند کیے ہوئے ہے اور رام اللہ اتھارٹی کے بعض عناصر اپنے مقاصد کی تکمیل کے لیے سیاسی کارکنوں کو ہراساں کررہے ہیں۔
حسام بدران نے فلسطینی حکومت سے مطالبہ کیا کہ وہ فوری طور پر سابق اسیر ناجح عاصی کے اغواء کاروں کو فوری بے نقاب کرتے ہوئے سیاسی رہ نمائوں کو مکمل تحفظ فراہم کرے۔ خیال رہے کہ گذشتہ روز رام اللہ میں نامعلوم مسلح افراد نے حماس رہ نما ناجح عاصی کو گن پوائنٹ پریرغمال بنا لیا تھا۔ اس سے قبل حماس کے ایک دوسرے رہ نما نادر مصطفیٰ کو بھی اغواء کرنے کی کوشش کی گئی تھی۔
بشکریہ:مرکزاطلاعات فلسطین