اسرائیلی ذرائع ابلاغ کے مطابق منگل کے روز اردن کے دارالحکومت عمان میں ہونے والی فلسطینی اتھارٹی اور اسرائیلی وفود کی ملاقات میں اتفاق کیا گیا ہے کہ مذاکرات جاری رہینگے اور اس سلسلے میں اگلی ملاقات آئندہ ہفتے عمان میں ہی ہو گی۔
اسرائیلی ریڈیو نے بدھ کے روز کی اپنی نشریات میں بتایاکہ گزشتہ روز اسرائیلی وزیر اعظم کے ترجمان یٹزاک مولخو اور فلسطینی اتھارٹی کے ترجمان صائب عریقات کے درمیان گفتگو میں اس بات پر اتفاق کیا گیا ہے کہ ایسی ملاقاتوں کا سلسلہ جاری رہے گا۔ اور آئندہ ہفتے عمان میں ہی مذاکرات کے سلسلے کو آگے بڑھایا جائے گا۔
اسرائیل کی جانب سے مذاکرات کے اگلے دور کے وقت کے اعلان نے اردنی وزیر خارجہ ناصر جودہ کے بیان کو غلط ثابت کر دیا ہے جس میں انہوں نے کہا کہ تھا کہ آئندہ ہونے والے کسی بھی مذاکراتی دور کا اعلان صرف میزبان ملک اردن ہی کرے گا۔ ناصر جودہ کا کہنا تھا کہ صرف اردن ہی کو اگلی کسی بھی ملاقات کے وقت اور جگہ کا اعلان کرنے کا اختیار ہو گا۔
دوسری جانب اسرائیلی اعلی سیاسی ذرائع نے عمان میں ہونے والی اس ملاقات کی اسرائیل کے لیے اہمیت بھی بیان کی۔ اعلی اسرائیلی قیادت کسی پیشگی شرط کے بغیر فلسطینی اتھارٹی کے ساتھ مذاکرات کی بحالی کو بڑی کامیابی قرار دے رہے ہیں۔
خیال رہے کہ فلسطینی اتھارٹی اور اسرائیل کے مابین سولہ ماہ کے تعطل کے بعد شروع ہوئے ہیں۔ ستمبر 2010ء میں یہ مذاکرات اس وقت تعطل کا شکار ہو گئے تھے جب اسرائیل نے مغربی کنارے میں یہودی بستیوں کی تعمیر روکنے سے انکار کر دیا تھا۔