رام اللہ ( فلسطین نیوز۔مرکز اطلاعات) فلسطینی ایوان صدر کی طرف سے جاری کردہ ایک بیان میں امریکا کی صہیونیت نوازی کی
شدید الفاظ میں مذمت کرتے ہوئے کہا گیا ہے کہ فلسطینی قوم پر مظالم میں اسرائیل کے ساتھ امریکا بھی برابر کا شریک ہے۔
ابو ردینہ کا کہنا تھا کہ امریکی حکومت کے اقدامات فلسطین قوم کے خلاف اشتعال پھیلانے کی کوشش ہے۔ امریکی سفارت خانے کی بیت المقدس منتقلی سے انتہا پسند صہیونیوں کو نیا حوصلہ ملے گا۔ فلسطین میں یہودی آباد کاری میں اضافہ ہوگا اور بے گناہ فلسطینیوں پر مظالم بڑھ جائیں گے۔
انہوں نے کہا کہ امریکی صدر کی طرف سے اسرائیل کی مسلسل حمایت عالم اسلام کو مشتعل کرنے، مسلم دنیا کی کھلے عام توہین اور فلسطینی قوم کے بنیادی حقوق کے حصول کی کوششوں میں رخنہ ڈالنے کے مترادف ہے۔
فلسطینی ایوان صدر کا کہنا تھا کہ امریکا اور اسرائیل کے اشتعال انگیز اقدامات نے خطے کو ایک نئی مشکل سے دوچار کردیا ہے۔ امریکی اور صیہونی عزائم کا مقابلہ کرنے کے لیے تمام عرب اور مسلمان ممالک کو اپنی صفوں میں اتحاد پیدا کرنا ہوگا۔
ادھر فلسطینی وزیرخارجہ ریاض المالکی نے کہا ہے کہ فلسطینی حکومت امریکا کے ساتھ رابطے ختم کرنے کے اپنے فیصلے پر قائم ہے۔ ان کا کہنا تھا کہ جب تک امریکا اسرائیل کی طرف داری اور فلسطینیوں کے ساتھ انتقامی پالیسی ترک نہیں کرتا اس وقت تک امریکی انتظامیہ سے رابطے بحال نہیں کیے جائیں گے۔