فلسطین کے مقبوضہ مغربی کنارے میں سلفیت کے مقام پر فلسطینیوں کی ہتھیائی گئی اراضی پر اسرائیلی فوج کے لگائے گئے عارضی کیمپ پر مقامی شہریوں نے ہلہ بول دیا اور کئی خیمے اکھاڑ پھینکے۔
فلسطینیوں کی یلغار کے دوران بگدر مچنے سے کم سے کم دو اسرائیلی فوجیوں کے زخمی ہونے کی بھی اطلاعات ہیں۔
مرکز اطلاعات فلسطین کے مطابق فلسطینی مظاہرین اور اسرائیلی فوج میں تصادم کل جمعہ کے روز اس وقت ہوا جب یہودی فوجیوں نے سلفیت کے مغرب میں کفر الدیک قصبے نواحی علاقے "ظھرصبح” میں فلسطینیوں کا ایک احتجاجی کیمپ اکھاڑ پھینکا۔ یہ کیمپ شہریوں نے اپنی اراضی پراسرائیلی فوج کے غاصبانہ قبضے کے خلاف لگا رکھا تھا اور وہیں پر نماز جمعہ کا بھی اہتمام کیا گیا تھا۔
عینی شاہدین کے مطابق اسرائیلی فوجیوں نے عین اس وقت کیمپ پر یلغار شروع کر دی جب شہری نماز جمعہ کے لیے کیمپ میں جمع ہو رہے تھے۔ اسرائیلی فوج کے لاٹھی چارج اور آنسوگیس کی شیلنگ سے متعدد فلسطینی زخمی بھی ہوئے ہیں۔ اسرائیلی فوج کے مظالم کے جواب میں مشتعل فلسطینیوں نے دشمن فوج کے خیمے بھی اکھاڑ پھینکے۔ اس دوران دو اسرائیلی فوجیوں کے زخمی ہونے کی بھی اطلاعات ہیں۔
بشکریہ:مرکزاطلاعات فلسطین