مرکزاطلاعات فلسطین کے مطابق اسرائیل کے عبرانی اخبار”یدیعوت احرونوت” نے "رمبام” نامی اسرائیلی اسپتال میں زیرعلاج دو فوجیوں کی تصاویر شائع کی ہیں۔ ان تصاویر سے اسرائیلی پولیس اور فوج کے اس دعوے کی بھی تردید ہوتی ہے کہ فلسطینیوں کے ساتھ جھڑپ میں صرف ایک فوجی معمولی زخمی ہوگیا تھا۔ تصاویر میں غرب اردن میں تعینات اسرائیلی پولیس چیف کو بھی زخمی فوجیوں سے گفتگو کرتے دیکھا جاسکتا ہے۔
خیال رہے کہ سوموار کے روز فلسطین کے مقبوضہ مغربی کنارے کے شمالی شہر جنین میں ایک پناہ گزین کیمپ پر اسرائیلی فوج کی کمانڈویونٹ”یمام” کے دسیوں اہلکاروں اور فلسطینی شہریوں کے درمیان تصادم ہوگیا تھا جس کے نتیجے میں دو فوجی کمانڈو اورمتعدد فلسطینی زخمی ہوگئے تھے۔
یہ واقعہ اس وقت پیش آیا تھا جب اسرائیلی فوجیوں نے اسلامی تحریک مزاحمت "حماس” کے ایک مقامی رہ نما ابو الھیجاء کے گھر پر دھاوا بول دیا اور گھر میں گھس کراہل خانہ کو تشدد کا نشانہ بنانے کے بعد ابو الھیجاء، اس کی والدہ، ایک بھائی اور بیٹے کو حراست میں لے لیا تھا۔صہیونی فوجیوں کی اس وحشیانہ کارروائی کےرد عمل میں شہری گھروں سے باہر نکل آئے اور انہوں نے صہیونی فوج کے خلاف شدید نعرے بازی شروع کردی۔ قابض فوجیوں نے مظاہرین کو منتشر کرنے کے لیے لاٹھی چارج کیا۔ اس دوران فائرنگ اور سنگ باری سے دو اسرائیلی فوجی زخمی اور متعدد گاڑیوں کو نقصان پہنچا تھا۔
اسرائیل کے ایک دوسرے عبرانی اخبار”ہارٹز” کی رپورٹ کے مطابق زخمی ہونے والے دونوں فوجی سینیر افسر ہیں۔ ایک دوسرے اخبار”معاریف” کی رپورٹ کے مطابق ایک فوجی اپنے ساتھی کی فائرنگ سے زخمی ہوا ہے۔ تاہم اس واقعے کی اعلیٰ سطحی تحقیقات شروع کردی گئی ہیں۔