سنہ 1993ء کے اوسلو معاہدے کے بعد مسلسل اٹھارہ سال سے مسئلہ فلسطین کے دو ریاستی حل کی حامی فلسطینی تنظیم ’’فتح‘‘ کی جنوبی اضلاع کی سینئر رہنما کمیٹی کے سربراہ ڈاکٹر عبد اللہ ابو سھدانہ نے اسرائیل سے مذاکرات میں مسلسل ناکامی کے بعد ’’ایک ریاستی حل‘‘ کی تائید کر دی ہے۔
ڈاکٹر ابو سمھدانہ کا کہنا ہے کہ اسرائیلی حکومت کی ضد اور ہٹ دھرمی کے باعث مسئلے کے تصفیے کے لیے اب صرف ایک ریاستی حل پر اعتماد کرنا ہی لازم ہو گیا ہے۔ اسرائیل کی جانب سے قتل و غارت گری اور سیاسی عمل کو یکسر ختم کرنے کے بعد اب نام نہاد ’’دو ریاستی حل‘‘ کی گنجائش باقی نہیں رہی۔
فتحاوی رہنما ابو سمھدانہ کا کہنا تھا کہ اب مسئلہ فلسطین کے تصفیے کی راہ ہموار کرنے کی تمام کوششوں میں ناکامی کے بعد اسرائیلی حکومت نے فلسطینیوں کے سامنے اب کوئی اختیار باقی نہیں چھوڑا۔ انہوں نے کہا کہ اسرائیلی حکومت کے اقدامات نے کسی بھی مستقل اور آزاد فلسطینی ریاست کے قیام کےخوابوں کو بھی قتل کر دیا ہے۔
انہوں نے عالمی برادری سے بھی مطالبہ کیا کہ وہ امریکہ اور اسرائیل پر مسئلہ فلسطین کے حل کا دباؤ بڑھائے۔
بشکریہ: مرکز اطلاعات فلسطین