(فلسطین نیوز۔مرکز اطلاعات) فلسطینی صدر محمود عباس کی جماعت تحریک فتح کے ایک سرکردہ رہنما نے صہیونی مظالم کے خلاف جاری تحریک انتفاضہ القدس کی کھل کرحمایت کرتے ہوئے اپنی جماعت اور فلسطینی اتھارٹی سے بھی انتفاضہ القدس کی حمایت کا مطالبہ کیا ہے۔
رپورٹ کے مطابق تحریک فتح کے لیڈر تیسیر نصراللہ نے کہا کہ صہیونی دشمن کے خلاف فلسطینی نوجوانوں کی انتفاضہ پوری قوم کی تحریک ہے اور اس کی حمایت میں فتح سمیت تمام جماعتوں اور لیڈروں کو اس کی کھل کرحمایت کرنی چاہیے۔ایک سوال کے جواب میں فتحاوی رہنما نے کہا کہ اس وقت تحریک انتفاضہ کسی لیڈر کے بغیر جاری ہے۔ صہیونی ریاست کے جنگی جرائم کے خلاف فلسطینی نوجوان نسل نبرد آزما ہے۔ بچے، بچیاں اور نوجواں اس تحریک کا ہراول دستہ ہیں۔
انہوں نے کہا کہ فلسطین میں شہدائے انتفاضہ کے جنازے کے جلوسوں سے یہ ثابت ہو رہا ہے کہ تحریک انتفاضہ پوری قوم کی تحریک ہے۔ انتفاضہ القدس وطن کی آزادی کی تحریک کا حصہ ہے۔ اس تحریک میں اپنی جانوں کے نذرانے پیش کرنے والے نوجوان، بچے، بچیاں پوری قوم کے یکساں ہیرو ہیں ۔
تیسیر نصراللہ نے فلسطینی اتھارٹی کی جانب سے تحریک انتفاضہ کو سپورٹ نہ کرنے پراسے کڑی تنقید کا نشانہ بنایا اور کہا کہ اتھارٹی کی طرف سے تحریک کی حمایت نہ کرکے عوامی غم وغصہ اپنی جانب موڑنے کی کوشش کررہی ہے۔