قابض اسرائیلی فوج کے ایک مبینہ ڈرون طیارے نے بدھ اور جمعرات کی درمیانی شب غزہ کی پٹی میں فلسطینیوں پر کئی میزائل داغے ہیں جس کے نتیجے میں دو افراد شہید اور متعدد زخمی ہوگئے، جبکہ حملے میں کئی عمارتیں بھی ملبے کا ڈھیر بن چکی ہیں۔
مرکزاطلاعات فلسطین کے مطابق صہیونی فوج کے جاسوس طیارے نے غزہ کی پٹی کے جنوب میں رفح کے مقام پر فلسطینی مزاحمت کاروں کے ایک گروپ کو نشانہ بنایا۔
رفح سے مقامی ذرائع نے ‘‘پی آئی سی’’ کو بتایا کہ رات گئے اسرائیل کے بغیر پائلٹ کے ایک جاسوس طیارے نے ابو طہ پٹرول اسٹیشن کے قریب کھڑی ایک کار کو میزائل سے نشانہ بنایا، کار میں سوار تین افراد میں سے دو موقع پرشہید ہوگئے جبکہ ایک کو شدید زخمی حالت میں اسپتال لے جایا گیا ہے۔ میزائل حملے میں پٹرول پمپ میں آگ بھڑک اٹھی اور کئی دیگرعماریں بھی زمین بوس ہوگئی ہیں۔
صہیونی غارت گری میں شہید ہونے والے شہریوں کی شناخت اشرف ابو صالح اور انیس ابو العینین کے ناموں سے کی گئی ہے۔ بدھ کی شام اسرائیلی فوج کے ایف سولہ طیاروں اور ڈرون طیاروں کی نچلی پروازوں نے شہریوں کو خوف وہراس میں مبتلا کردیا تھا۔ صہیونی جنگی جہازوں کی آمد کے بعد شہری گھروں میں دبک کر رہ گئے تھے۔ عینی شاہدین کا کہنا ہے کہ ڈرون طیارے کے میزائل حملے سے قبل اسرائیلی فوج کا ایک اپاچی ہیلی کاپٹربھی حملے مقام پر فضاء میں چکر لگاتا رہا ہے، جس کے کچھ ہی دیر بعد ایک جاسوس طیارے نے میزائل حملہ کر دیا۔
بشکریہ: مرکز اطلاعات فلسطین