غزہ (فلسطین نیوز۔مرکز اطلاعات) فلسطین کے علاقے غزہ کی پٹی میں اسرائیلی فوج اور فلسطینی مزاحمت کاروں کے درمیان ایک روز تک جاری رہنے والی جھڑپوں کے بعد مصر کی مساعی سے جنگ بندی کے فیصلے پر تحریک فتح نے شدید تنقید کی ہے۔
فلسطین نیوز کو موصول ہونے والی اطلاعات کے مطابق تحریک فتح کے ترجمان عاطف ابو یوسف نے ایک بیان میں کہا کہ غزہ میں جنگ بندی میں حماس نے پہل کی اور حماس ہی کی کوششوں سے جنگ بندی کی گئی ہے۔تحریک فتح کے ترجمان نے حماس کو تنقید کا نشانہ بنایا اور کہا کہ ایک طرف حماس غزہ میں قومی حکومت کو ذمہ داریاں سونپنے سے فرار اختیار کررہی ہے۔ وہ فلسطینی اتھارٹی پر اسرائیل سے ساز باز کا الزام عائد کرتی ہے مگر خود وہ اسرائیل کے ساتھ جنگ بندی معاہدے بھی کررہی ہے۔
خیال رہے کہ منگل کے روز غزہ کی پٹی پر اسرائیلی فوج نے فضائی حملے شروع کیے تو اس کے جواب مین فلسطینی مزاحمت کاروں نے راکٹوں سے حملہ کیا۔ فلسطینی مزاحمت کاروں کے راکٹ حملوں کے بعد صیہونی ریاست مصر کی ثالثی کے تحت جنگ بندی پرمجبور ہوگئی تھی۔