رپورٹ کے مطابق جمعرات کو اسرائیلی فوجیوں نے بیت المقدس سے دو فلسطینی بچوں کو گرفتار کیا ہے اور دعویٰ کیا ہے کہ ان کے قبضے سے بھی چاقو برامد کیے گئے ہیں۔
فلسطینی امدادی ادارے ہلال احمر کی جانب سے جاری کردہ ایک بیان میں بتایا گیا ہے کہ جمعرات کو شمالی الخلیل میں العروب پناہ گزین کیمپ میں اسرائیلی فوجیوں نے 50 سالہ ابراہیم براذعیہ کو گولیاں مار کر شہید کردیا۔ صہیونی فوجیوں نے شہید فلسطینی شہری کاجسد خاکی بھی قبضے میں لے لیا ہے۔
رپورٹ کے مطابق شہید فلسطینی کا تعلق الخلیل شہر کے صوریف قصبے سے ہے اور وہ کئی سال تک اسرائیل کی جیلوں میں قید بھی کاٹ چکا ہے۔
رپورٹ کے مطابق فوجیوں نے فلسطینی شہری پر اس وقت فائرنگ کی جب اس نے ایک فوجی اہلکار پر کلہاڑے سے وار کرنے کی کوشش کی تھی۔ فوجیوں کی فائرنگ سے فلسطینی شہری موقع پر ہی دم توڑ گیا۔
ادھر ایک دوسری پیش رفت میں اسرائیلی فوجیوں نے بیت المقدس سے دو فلسطینی بچوں کو حراست میں لے لیا ہے۔ اسرائیلی حکام کا کہنا ہے کہ گرفتار کیے گئے بچوں نے یہودی فوجیوں پر چاقو سے حملوں کی منصوبہ بندی کی تھی۔ ان کے قبضے سے چاقو بھی برآمد کیے گئے ہیں۔ دونوں بچوں کی عمریں 10 سال کے درمیان بیان کی جاتی ہیں۔
پی آئی سی کے نامہ نگار کے مطابق اسرائیلی فوجیوں نے الخلیل شہرکی ایک بچی کا بھی تعاقب شروع کیا ہے اور کہا ہے کہ بچی نے یہودی فوجیوں پر چاقو سے حملے کی کوشش کی تھی مگر وہ فرارمیں کامیاب ہوگئی تھی۔