(فلسطین نیوز۔مرکز اطلاعات) فلسطین کے مقبوضہ مغربی کنارے کے شمالی شہر نابلس میں فلسطینی نوجوانوں کی جانب سے سنگ باری کے نتیجے میں ایک یہودی آباد کار خاتون شدید زخمی ہوگئی۔ سنگ باری کے نتیجے میں اس کی کار کے شیشے بھی ٹوٹ گئے۔
رپورٹ کے مطابق منگل کے روز نابلس کے جنوبی قصبے حوارہ میں فلسطینی نوجوانوں نے یہودی خاتون کی کار پر سنگ باری کی جس کے نتیجے میں کار میں موجود خاتون زخمی ہوگئی۔ پتھراؤ سے کار کے شیشے بھی بری طرح ٹوٹ پھوٹ کا شکار ہوئے ہیں۔واقعے کے فوری بعد اسرائیلی فوج کی بڑی تعداد جائے وقوعہ پر پہنچ گئی اور سنگ باری کرنے والے فلسطینیوں کو حراست میں لینے کے بعد نامعلوم مقام پر منتقل کردیا ہے۔
خیال رہے کہ حوارہ کے مقام پر یہودی گاڑیوں اور یہودی آباد کاروں کے تجارتی مراکز کو فلسطینی شہریوں کی جانب سے آئے روز حملوں کا سامنا رہتا ہے۔ اسرائیلی فوج کی جانب سے سخت ترین ناکہ بندی کے باوجود فلسطینی شہری رکاوٹیں توڑ کراسرائیلی اہداف پر پتھراؤ کرتے رہتے ہیں۔