عراق کے دارالحکومت بغداد کے نواح میں فلسطینی آبادیوں اور مہاجر کیمپوں میں عراقی پولیس اور سیکیورٹی فورسز نے تلاشی کا نیا سلسلہ شروع کیا ہے جس کے نتیجے میں درجنوں افراد کو حراست میں لیا گیا ہے۔
مرکز اطلاعات فلسطین کے مطابق بغداد کے جنوب مشرق میں فلسطینی بلدیات میں کم سے کم گیارہ سو فلسطینی خاندان آباد ہیں۔ فلسطین عراق رابطہ گروپ نے اپنی رپورٹ میں بتایا کہ جمعرات اور جمعہ کی درمیانی شب کئی 500 پولیس اہلکاروں، خفیہ اداروں کے اہلکاروں اور دیگر سیکیورٹی فورسز نے اچانک فلسطینی آبادیوں کا گھیراؤ کیا، جس کے بعد ایک ایک گھر کی جامہ تلاشی کا سلسلہ شروع ہو گیا جو رات گئے تک جاری رہا۔ گھرگھر تلاشی اور چھاپہ مار کارروائیوں کے دوران شہریوں کو زد و کوب کیا۔
خیال رہے کہ فلسطینی آبادیوں کی تازہ تلاشی ایک ایسے وقت میں لی گئی ہےجب دو روز قبل پولیس نے ایک معمر شہری سمیت تین فلسطینیوں کو حراست میں لینے سے قبل سرعام وحشیانہ تشدد کا نشانہ بنایا تھا جس کے بعد انہیں نامعلوم مقام پر منتقل کر دیا گیا۔ ابھی تک ان کے بارے میں معلوم نہیں ہوسکا کہ وہ کہاں اور کس حال میں ہیں۔
فلسطین ۔ عراق رابطہ گروپ نے پولیس کے چھاپوں اور تلاشی کی شدید مذمت کی ہے۔ انسانی حقوق کے گروپ کا کہنا ہے کہ فلسطینی آبادیوں میں پولیس کا گھس کر نہتے شہریوں کو تشدد کا نشانہ بنانا بغداد میں متعین فلسطینی ہائی کمیشن کی سفارتی ناکامی کا منہ بولتا ثبوت ہے۔
بشکریہ: مرکز اطلاعات فلسطین