مرکز اطلاعات فلسطین کے مطابق فلسطینی مجلس قانون ساز کے اسپیکر ڈاکٹر عزیز دویک نے بین الاقوامی پارلیمنٹ کے اسپیکر "مارٹن چانگونگ” کو ایک مکتوب ارسال کیا ہے جس میں ان سے دورہ فلسطین کے دوران فلسطینی پارلیمنٹ کے ارکان سے ملاقات نہ کرنے پر سخت احتجاج کیا ہے۔
مکتوب میں کہا گیا ہے کہ عالمی پارلیمنٹ کے اسپیکر نے فلسطین کے دورے کے دوران غیر جانب داری کا مظاہرہ کرنے کے بجائے مخصوص جماعت کے بعض ارکان پارلیمنٹ، فلسطینی اتھارٹی کے عہدیداروں اور کچھ سیاسی رہ نمائوں سے ملاقات کی لیکن پارلیمنٹ کے ایک بڑے گروپ”اصلاح وتبدیلی” کے ارکان سے کسی قسم کی ملاقات نہیں کی گئی اور نہ ہی ان سے ملاقات کی خواہش کا اظہار کیا گیا۔’
ڈٓاکٹر دویک کا کہنا ہے کہ عالمی پارلیمنٹ کے اسپیکر نے دورہ فلسطین کے دوران عالمی سفارتی آداب کی خلاف ورزی کی ہے۔ انہیں اپنی غلطی تسلیم کرنا چاہیے۔
خیال رہے کہ عالمی پارلیمنٹ کے چیئرمین مارٹن چانگونگ نے حال ہی میں اسرائیل اور پھر فلسطینی علاقے کا دورہ کیا تھا جہاں انہوں نے تحریک فتح کے بعض ارکان پارلیمنٹ اور صدر محمود عباس سے ملاقات کی۔ اپنے دورے کے دوران انہوں نے فلسطینی پارلیمنٹ کے بڑے گروپ اصلاح وتبدیلی کے ارکان سے کسی قسم کی ملاقات نہیں کی۔ اصلاح وتبدیلی اسلامی تحریک مزاحمت "حماس” کا پارلیمانی بلاک ہے۔
بشکریہ:مرکزاطلاعات فلسطین