مرکز اطلاعات فلسطین کے مطابق عرب لیگ کے قاہرہ میں ہفتے کے روز ہوئے وزراء خارجہ کے اجلاس میں غزہ کی پٹی میں اسرائیلی فوج کی یلغار کی شدید مذمت کی گئی اور عالمی دہشت گردی قرار دیتے ہوئے اسے فوری طور پر بند کرنے کا مطالبہ کیا گیا۔ اجلاس کے بعد میڈیا کو جاری ایک بیان میں کہا گیا کہ عالمی برادری کی ذمہ داری ہے کہ وہ فلسطینیوں کو صہیونی فوج کے تباہ کن اسلحہ کا شکار ہونےسے بچائے۔ اسرائیل دانستہ طور پر فلسطینیوں کے خلاف جنگ مسلط کیے ہوئے ہے۔ اب اس جنگ کا مستقل بنیادوں پر خاتمہ ہونا چاہیے۔
بیان میں کہا گیا کہ غزہ کی پٹی پر اسرائیلی حملے عالمی برادری کے دہرے معیار کے عکاس ہیں۔ کیونکہ عالمی برادری کی صہیونی جرائم پرخاموشی قابض فوج کو اپنی جارحیت رکھنے اور بے گناہوں کے قتل عام کا جواز فراہم کر رہی ہے۔ عرب لیگ کا کہنا ہے کہ اب عالمی خاموشی کسی صورت میں برداشت نہیں کی جائے گی۔ فلسطینیوں کو ان کے حقوق دلانے کا وقت آ گیا ہے۔ طاقت کے ذریعے مظلوموں کے حقوق کو اب زیادہ دیر تک دبایا نہیں جا سکتا ہے۔
عرب لیگ کے وزرا خارجہ اجلاس کے بعد آج کئی ممالک کے وزراء خارجہ جنگ زدہ شہر غزہ کی پٹی کا دورہ بھی کریں گے اور صورت حال سے آگاہی کے حصول کے بعد آئندہ کی حکمت عملی تیار کی جائے گی۔