مقبوضہ بیت المقدس (روز نامہ قدس ۔آن لائن خبر رساں ادارہ) گذشتہ ہفتے فلسطین میں اسرائیلی ریاستی دہشت گردی کے نتیجے میں 6 فلسطینی شہید اور 123 زخمی ہوئے جب کہ فلسطینیوں اور قابض اسرائیلی فوج کے درمیان 109 مقامات پر تصادم ہوا۔
روز نامہ قدس کو موصول ہونے والی اطلاعات کے مطابق حماس کے شبعہ اطلاعات کی طرف سے جاری کردہ ہفتہ وار رپورٹ میں بتایا گیا ہے کہ اسرائیلی فوج کی ریاستی دہشت گردی کا سلسلہ گذشتہ ہفتے بھی جاری رہا۔ اسرائیلی فوج نے دہشت گردانہ کارروائیوں میں چھ فلسطینی شہری شہید ہوئے۔
گذشتہ ہفتے فلسطینیوں کی مزاحمتی کارروائیوں میں 3 صیہونی ہلاک اور 11 زخمی ہوئے۔
دو فلسطینیوں کو غزہ کی پٹی میں گذشتہ جمعہ کو گولیاں مار کرشہید کردیا گیا۔ اس کے علاوہ بیت لحم میں ایک فلسطینی کو شہید اور دو فلسطینیوں کو مشرقی نابلس میں بلاطہ پناہ گزین کیمپ میں شہید کیا گیا۔
رپورٹ کےمطابق گذشتہ ہفتے اسرائیلی فوج کی فائرنگ سے 123 فلسطینی زخمی ہوئے۔ ان میں سے 62 فلسطینی گذشتہ جمعہ کو غزہ کی پٹی میں ہونے والے ایک مظاہرے میں جب کہ 32 فلسطینی منگل کے روز اور چار سوموار کو اور آٹھ فلسطینی اتوار کے روز اسرائیلی فائرنگ سے زخمی ہوئے۔