صہیونی فوج کی دہشت گردی سے فلسطینی شہید

(فلسطین نیوز۔مرکز اطلاعات) فلسطین کے مقبوضہ مغربی کنارے کے شمالی شہر طولکرم میں سوموار کو علی الصباح قابض صہیونی فوجیوں نے ’’سلعوت‘‘ یہودی کالونی کے قریب ایک فلسطینی کو گولیاں مار کر شہید کردیا۔ صہیونی فوجیوں نے الزام عائد کیا ہے کہ فلسطینی نوجوان کو گولیاں اس وقت ماری گئیں جب اس نے یہودی فوجیوں پر چاقوسے حملے کی کوشش کی تھی۔

مقامی فلسطینی ذرائع نے بتایا کہ صہیونی فوجیوں نے طولکرم کے نواحی علاقے کفر جمال میں 18 سالہ فلسطینی نوجوان احمد حسن توبہ کو شہید کردیا۔

دوسری جانب اسرائیلی فوجیوں نے دعویٰ کیا ہے کہ شمالی طولکرم میں یہودی کالونی کے قریب فلسطینی نوجوان کو چاقو سے حملے کی کوشش کے دوران گولیوں کا نشانہ بنایا گیا۔

خیال رہے کہ پچھلے سال اکتوبر کے بعد سے اب تک صہیونی فوجیوں کی فائرنگ سے 170 کے قریب فلسطینی شہید ہوچکے ہیں۔