مقبوضہ بیت المقدس – (فلسطین نیوز۔مرکز اطلاعات) صہیونی فوج نے شہید فلسطینی نوجوان مہند الحلبی کی عمر رسیدہ والدہ کو پوچھ گچھ کے لیے پولیس مرکز میں طلب کرنے کے بعد حراست میں لے لیا جسے بعد ازاں کسی نامعلوم مقام پر منتقل کردیا گیا ہے۔
فلسطین نیوز کو موصول ہونے والی اطلاعات کے مطابق بیت المقدس سے تعلق رکھنے والے شہید مہند الحلبی کی والدہ کو گذشتہ روز اسرائیلی پولیس نے ایک پولیس سیںٹر میں پیش ہونے کا نوٹس جاری کیا۔ وہ پیش ہوئیں تو بارڈر فورسز نے انہیں حراست میں لے لیا۔ اسرائیلی ذرائع ابلاغ کے مطابق معمر فلسطینی خاتون کو تفتیش کے لیے انٹیلی جنس حکام کے حوالے کردیا گیا ہے۔ایک مقامی ذرائع کا کہنا ہے کہ شہید مہند الحلبی کی ماں کو 96 گھنٹوں کے لیے حراست میں لیا گیا ہے اور اس سے کسی خفیہ مقام پر تفتیش جاری ہے۔
صہیونی میڈیا کے مطابق شہید کی والدہ کی گرفتاری فیس بک پر اسرائیل کے خلاف اشتعال پھیلانے کے الزام میں عمل میں لائی گئی ہے۔ حلبی کے خاندان نے ایک عمر رسیدہ خاتون کی گرفتاری اور اسے نامعلوم مقام پر منتقل کیے جانے کی شدید الفاظ میں مذمت کرتے ہوئے اسے ننگی جارحیت اور عالمی قوانین کی کھلی خلاف ورزی قرار دیا ہے۔
خیال رہے کہ مہند الحلبی نامی ایک فلسطینی نوجوان کو چند ماہ قبل قابض اسرائیلی فوج نے گولیاں مار کر شہید کردیا تھا۔