(فلسطین نیوز۔مرکز اطلاعات) فلسطین کے مقبوضہ بیت المقدس شہرمیں مسلمانوں کے قبلہ اوّل پر یہودی شرپسندوں کی یلغار جاری ہے۔منگل کے روز کم سے کم ایک سو یہودی آباد کاروں اور فوجیوں نے مسجد اقصیٰ میں داخل ہوکر مقدس مقام کی بے حرمتی کی۔
بیت المقدس اور مسجد اقصیٰ کے دفاع میں سرگرم کیو پریس کی جانب سے جاری کردہ ایک بیان میں بتایا گیا ہے کہ قبلہ اوّل کی زمانی اور مکانی تقسیم کی سازشیں بدستور جاری ہیں۔ انہی سازشوں کے تسلسل میں منگل کو یہودی شرپسندوں کی بڑی تعداد نے قبلہ اوّل میں گھس کرتلمودی تعلیمات کے مطابق مذہبی رسومات ادا کیں اور مقدس مقام کی بے حرمتی کی۔رپورٹ کے مطابق قبلہ اوّل میں یہودی آباد کاروں کی آمد کے بعد وہاں پرموجود فلسطینی شہریوں نے نعرے لگائے۔ فلسطینیوں کے نعرہ تکبیر’’اللہ اکبر‘‘ سےمسجد کی فضاء گونج اٹھی۔
رپورٹ کے مطابق یہودی آباد کار اور فوجی مسجد اقصیٰ کے مراکشی دروازے کے راستے اندر داخل ہوئے۔ قریبا ایک سو یہودیوں نے قبلہ اوّل میں داخل ہوکرمقدس مقام کی بے حرمتی کی۔
عینی شاہدین نے بتایا کہ مسجد اقصیٰ میں تلمودی تعلیمات کی آڑ میں مقدس مقام کی بے حرمتی کرنے والوں میں مغربی کنارے سے بھی یہودی آباد آئے۔ ان میں کئی اسرائیلی فوجیوں بھی شامل تھے۔
رپورٹ کے مطابق مراکشی دروازے سے داخل ہونے والے 47 سول یہودی اور 50 فوجی اہلکار شامل تھے۔