مرکز اطلاعات فلسطین کے مطابق مقامی وادی بزیق کی یونین کونسل کے چیئرمین محمد حروب نے بتایا کہ کل جمعہ کو اسرائیلی فوجیوں نے چھاپہ مارا اور شہریوں کو گھر خالی کرنے کے نوٹس جاری کیے۔ ان نوٹسز میں کہا گیا ہے کہ تمام مقامی فلسطینی 12 سے 20 جنوری کے درمیان اپنے گھر بار چھوڑ دیں کیوں کہ فوج کو اس علاقے میں جنگی مشقیں کرنا ہے۔
ایک سوال کے جواب میں محمد حروب کا کہنا تھا کہ وادی بزیق میں باری خاندانوں کو صہیونی فوج کی جنگی مشقوں کی وجہ سے سخت سردی میں بے گھر ہونا پڑے گا۔ متاثرین میں محمد حسین ترکمان، عادل عبداللہ حروب، قعدان زبو زھو، معاذ مثقال نغنغیہ، برکات فارس نغنغیہ اور محمد علی حروب شامل ہیں۔
مقامی شہریوں کا کہنا ہے کہ انہیں پہلی مرتبہ گھر خالی کرنے کا حکم نہیں دیا گیا بلکہ ماضی میں بھی اسرائیلی فوج جنگی مشقوں کی آڑ میں فلسطینیوں کو گھر بار چھوڑنے پر مجبور کرتی رہی ہے، یہ سلسلہ سال ہا سال سے جاری ہے۔ ایک مقامی شہری نے بتایا کہ صہیونی فوج کی جنگی مشقوں کے دوران فلسطینی آبادی کو مقامی قدرتی وسائل حتیٰ کہ پانی سے استفادے کی بھی اجازت حاصل نہیں ہوتی۔
بشکریہ:مرکزاطلاعات فلسطین