فلسطینی اتھارٹی کے ہاں تعینات جنوبی افریقہ کے قونصل جنرل ملون جیسی اور فرسٹ سیکرٹری نے منگل کے روز رام اللہ میں فلسطینی پارلیمنٹ کے اسپیکرڈاکٹر عزیز دویک سے ملاقات کی۔
ملاقات میں باہمی دلچسپی کے امور پربات چیت اور فلسطینی سیاسی جماعتوں کے درمیان مفاہمت کی ضرورت پر زور دیا گیا۔
مرکزاطلاعات فلسطین کے مطابق جنوبی افریقی سفارت خانے کے عہدیداروں نے اسپیکر پارلیمنٹ ڈاکٹر عزیز دویک کے چیمبرمیں ان سے ملاقات کی۔ اس موقع پر اراکین پارلیمنٹ احمد عطون اور محمد ماہر بھی موجود تھے۔ گفتگو کرتے ہوئے جنوبی افریقہ کے سفیر مسٹرمکالیما نے ڈاکٹر عزیز دویک اور دیگر اراکین قانون ساز کونسل کو صہیونی جیل سے رہائی پرمبارکباد بھی پیش کی۔
عزیز دویک نے افریقی سفارت کاروں کی ملاقات کے لیے ان کے دفترمیں آمد پرشکریہ ادا کیا۔ انہوں نے مہمان وفد پر زور دیا کہ وہ اسرائیلی جیلوں میں پابند سلاسل فلسطینی اراکین قانون ساز کونسل کی رہائی کے لیے مزید اقدامات کریں۔ فلسطینی ریاست کی آزادی اور مظلوم فلسطینیوں کے حقوق کی حمایت کرنے پرفلسطینی اسپیکر نے جنوبی افریقہ کا شکریہ بھی ادا کیا۔
فریقین میں ہونے والی بات چیت میں فلسطینیوں کے درمیان مفاہمتی مساعی کے فروغ کا معاملہ بھی زیربحث آیا۔ جنوبی افریقہ کے سفیرنے ڈاکٹر عزیز دویک سےگفتگو میں فلسطینی سیاسی جماعتوں بالخصوص اسلامی تحریک مزاحمت ’’حماس‘‘ اور صدر محمود عباس کی جماعت الفتح کے درمیان مفاہمت کا عمل آگے بڑھانے کی ضرورت بھی زور دیا۔ جنوبی افریقہ کے مندوب کا کہنا ھا کہ فلسطینی عوام اپنے حقوق کے لیے متحد ہوکر بہتر انداز میں جدو جہد کر سکتے ہیں۔
بشکریہ: مرکز اطلاعات فلسطین