فلسطین سے موصولہ اطلاعات میں بتایا گیا ہے کہ جنوبی غزہ کی پٹی کے شہر خان یونس کی مشرقی بلدیہ عبسان الکبیرہ کے قریب واقع اسرائیلی سیکیورٹی باڑ کے قریب اسرائیلی فوج کی فائرنگ کا نشانہ بننے والی اٹھاون سالہ فلسطینی خاتون آمنہ عطیہ قدیح جام شہادت نوش کر گئیں ہیں۔
غزہ میں وزارت صحت کے ترجمان ڈاکٹر اشرف القدرہ نے بتایا کہ شہیدہ آمنہ عطیہ کا جسد خاکی خان یونس میں قائم ناصر ہسپتال منتقل کر دیا گیا ہے۔
تفصیلات کے مطابق آمنہ قدیح کو گذشتہ شب اسرائیلی فوجیوں نے گولی کا نشانہ بنایا، اطلاع ملنے پر ایمبولنس سروسسز نے فائرنگ سے زخمی ہونے والی خاتون تک پہنچنے کی کوشش کی لیکن رات کی تاریکی اور اسرائیلی سرحدی باڑ قریب ہونے کی وجہ سے وہ زخمی خاتون کو ‘ریسکیو’ کرنے میں ناکام رہے۔ رات بھر خون بہہ جانے کی وجہ سے آمنہ قدیح جان شہادت نوش کر گئیں۔
مقامی ذرائع نے بتایا کہ بزرگ خاتون نفسیاتی مسائل کا شکار تھیں، انہیں سرحدی باڑ کے قریب دیکھ کر اسرائیلی فوجیوں کے کسی وارننگ کے بغیر اس پر براہ راست فائرنگ کر دی، جس سے زخمی ہونے کے بعد وہ فوری طبی امداد نہ ملنے کی وجہ سے وہ شہید ہو گئیں۔