اسرائیلی سکیورٹی فورسز نے مغربی کنارے کے شہر جنین کے الیامون ٹاؤن پر دھاوا بول کر بڑی انہدامی کارروائی کی ہے جس میں متعدد فلسطینی املاک کو مسمار کردیا گیا۔ ادھر اسرائیلی خفیہ ایجنسی نے علاقے کے چار فلسطینیوں کو تفتیش کے لیے فوجی اڈے سالم میں طلب کرلیا ہے۔
قامی ذرائع کے مطابق العرقہ اور کفردان کے علاقوں میں بھی فلسطینی تعمیرات منہدم کی گئیں۔ تفصیلات کے مطابق اسرائیلی فوجیوں نے بسام سلامہ خمایسہ، 45 سالہ، کے گھر کو منہدم کردیا ہے، انہیں دو ہفتے قبل ہی اسرائیلی قید سے رہائی ملی تھی۔ اسی طرح ایاد اور محمود نام کے دو بھائیوں کے گھر میں بھی توڑ پھوڑ کی گئی۔ دونوں بھائیوں کی عمریں بالترتیب 44 اور 46 سال ہیں اور دونوں تاجر ہیں، اسرائیلی اہلکاروں نے گھر کو گرانے کے ساتھ ساتھ ان دونوں کو پوچھ تاچھ کے لیے بھی بلا لیا ہے۔
چونتیس سالہ شاھر راجح زاید جو تحریک جہاد اسلامی کے کارکن ہیں اور پہلے بھی اسرائیلی فوج کی قید میں رہ چکے ہیں، حارہ شرقیہ کے علاقے میں ان کے گھر میں بھی توڑ پھوڑ کی گئی۔ حملہ آور اسرائیلی فوجیوں نے گھر کے سامان کی تلاشی لی اور انہیں تفتیش کے لیے خفیہ ایجنسی کے ہیڈ کوارٹر حاضری کا نوٹس دیدیا۔
بشکریہ:مرکز اطلاعات فلسطین