تیونس حکام نے ذرائع ابلاغ میں شائع ان خبروں کی سختی سے تردید کی ہے جن میں دعویٰ کیا گیا تھا کہ وزیراعظم حمادی الجبالی جلد فلسطینی اتھارٹی کے ہیڈ کواٹر رام اللہ کا دورہ کرنے والے ہیں۔
مرکزاطلاعات فلسطین کے مطابق تیونس کی اسلام پسند حکمراں جماعت ’’تحریک نہضت‘‘ کے رکن السید محمد الفرجانی نے میڈیا کو بتایا کہ وزیراعظم حمادی الجبالی کا فی الحال دورہ فلسطین کا نہ کوئی ارادہ ہے اور نہ ہی بیرون ملک دوروں میں رام اللہ کا دورہ ان کے ایجنڈے میں شامل ہے۔ انہوں نے کہا کہ عرب اور بعض اسرائیلی ذرائع ابلاغ میں آنے والی ان تمام اطلاعات میں کوئی صداقت نہیں۔ ابھی تک وزیراعظم نے رام اللہ کے دورے کے بارے میں سوچا بھی نہیں ہے۔
خیال رہے کہ گذشتہ روز میڈیا میں آنے والی بعض اطلاعات میں بتایا گیا تھا کہ تیونس کے ما بعد انقلاب پہلے جمہوری وزیراعظم حمادی الجبالی کو رام اللہ میں تیونس ۔ فلسطین کلب کی جانب سے ایک تقریب میں شرکت کے لیے مدعو کیا گیا ہے جس کے لیے وہ جلد رام اللہ جائیں گے۔ رپورٹس میں بتایا گیا تھا کہ رام اللہ کے دوے کے دوران حمادی الجبالی کی صدر محمود عباس اور دیگر فلسطینی حکام کے ساتھ بھی ملاقات ہو گی۔
بشکریہ: مرکز اطلاعات فلسطین