فلسطین کے مقبوضہ مغربی کنارے سے متصل وادی اردن میں بے گھر فلسطینی باشندوں نے مکحول کے مقام پر خیمے نصب کرنے اور جھونپڑیاں تعمیر کرنے کا سلسلہ ایک مرتبہ پھر شروع کر دیا ہے۔ فلسطینیوں کی یہ تعمیرات اور آباد کاری اسرائیلی فوج کے لیے ایک کھلا چیلنج ہے کیونکہ قابض فوج وادی اردن کے علاقے مکحول میں فلسطینی باشندوں کو نکال باہر کرنے کی شرمناک سازش کر رہی ہے۔ اسی سازش کے تحت گذشتہ ماہ صہیونی فوج نے فلسطینیوں کے سیکڑوں مکانات تباہ کر دیے تھے جس کے بعد سے شہری خصوصا خواتین اور بچے کھلے آسمان تلے زندگی گذارنے پر مجبور تھے۔
مرکز اطلاعات فلسطین کے مطابق وادی اردن میں مکحول کے مقام پر بے گھرفلسطینی نوجوانوں اور رضاکاروں نے اپنی مدد آپ کے تحت دوبارہ خیمے نصب کرنا شروع کر دیے ہیں۔ سوموار کے روز فلسطینیوں نے کئی خیمے نصب کیے۔ اس موقع پر علاقے کو صہیونی فوج نے چاروں طرف سے گھیرے میں لے رکھا تھا۔
مقامی ذرائع اور عینی شاہدین نے بتایا کہ گھروں سے محروم فلسطینی شہریوں نے انسانی حقوق کی تنظیموں کی جانب سے ملنے والے خیمے لگانے اور منہدم ہونے والے مکانات کے ملبے پر دبارہ جھونپڑیاں کھڑی کرنا شروع کر دی ہیں۔
فلسطینیوں کو اسرائیلی فوج کی ریاستی دہشت گردی سے ایک مرتبہ پھر خطرہ ہے کیونکہ قابض فوج نے دو ہفتوں کے دوران فلسطینیوں کے اس علاقے میں تین مرتبہ خیمے اکھاڑ پھینکے تھے۔
ایک مقامی شہری عبداللہ دراغمہ نے مرکز اطلاعات فلسطین کو بتایا کہ "اسرائیلی فوج نے فلسطینیوں کو یہاں کسی قسم کی تعمیراتی سرگرمی سے روکنے کے لیے علاقے میں کرفیو لگا رکھا ہے۔ لیکن ہم نے صہیونی حکام کے کرفیو کے علی الرغم خیمے نصب کرنا شروع کر دیے ہیں۔ ہم اسرائیل کو یہ پیغام دینا چاہتے ہیں کہ فلسطین ہمارا وطن ہے جس میں رہنے کا حق ہم سے کوئی سلب نہیں کر سکتا اور نہ ہی ریاستی جبر کے تحت ہم اپنی زمین چھوڑنے کے لیے تیار ہیں۔”
انہوں نے کہا کہ ہمیں یہ معلوم ہے کہ صہیونی فوجی ان کی تازہ تعمیرات اور خیموں کو بھی اکھاڑ دیں گے، جیسا کہ وہ پہلے کرتے رہے ہیں، لیکن اپنے حقوق کے لیے مزاحمت ہمارا بھی فرض ہے۔
بشکریہ:مرکزاطلاعات فلسطین