بیت المقدس فائونڈیشن برائے ترقی نے بین الاقوامی برادری سے اپیل کی ہے کہ وہ قدیم بیت المقدس کے مضافاتی علاقے القرمی کی بحالی کے لئے فوری طور پر مداخلت کرے اور اس کے رہائشیوں کو بے دخلی سے بچا لے۔
ان گھروں کو اسرائیلی حکام کی جانب سے مسمار کرنے کے نوٹس پہنچا دئیے گئے ہیں اور اس کے علاوہ اسرائیلی کی جانب سے ان گھروں کے نیچے کھدائیوں اور سرنگوں کی تعمیر کی وجہ سے القرمی میں درجنوں گھروں میں دراڑیں نمودار ہونا شروع ہوگئی ہیں۔
فائونڈیشن نے ایک ایسی فلم جاری کی ہے جس میں ان کھدائیوں کی وجہ سے اس علاقے کی صورتحال کو منظر عام پر لایا گیا ہے۔ اس فلم میں بتایا گیا ہے کہ درجنوں گھروں کو مکمل طور پر مرمت کی ضرورت ہے۔
فائونڈیشن نے عرب اور اسلامی ممالک سے رابطہ کیا ہے کہ وہ اس علاقے میں جاری بحالی کے کاموں میں اپنا حصہ ڈالیں تاکہ بیت المقدس کے فلسطینیوں کی مدد ہوسکے اور ان کی حمایت کا اظہار کیا جا سکے۔ فائونڈیشن کے چئیرمین نے میڈیا ذرائع سے مطالبہ کیا ہے کہ وہ اس فلم کو زیادہ سے زیادہ دکھائیں تاکہ بیت المقدس کے رہائشیوں اور ان کی املاک کے خلاف ہونے والی کارروائیوں کے بارے میں دنیا کو زیادہ زیادہ پتا چل سکے۔
بشکریہ:مرکزاطلاعات فلسطین