مصرکی سب سے بڑی علمی درسگاہ جامعہ الازھر نے فلسطینی شہر بیت المقدس کی آئینی حیثیت سے متعلق ایک خصوصی دستاویز تیار کی ہے جس میں کہا گیا ہے کہ بیت المقدس پر مسلمہ حق صرف فلسطینی عوام اور مسلمانوں کا ہے۔
یہودیوں کا اس سے کوئی تعلق نہیں۔ جامعہ الازھرنے عالم اسلام سے مطالبہ کیا ہے کہ وہ بیت المقدس کے اسرائیلی محاصرے کو توڑنے کے لیے پوری قوت کے ساتھ مہم چلائیں۔
مرکز اطلاعات فلسطین کے مطابق نصرت القدس کانفرنس کے سیکرٹری جنرل ڈاکٹر سعید خال الحسن نے منگل کے روز بتایا کہ شیخ الازھر ڈاکٹر احمد الطیب کی نگرانی میں ایک "میثاق القدس” جاری کیا گیا ہے، جس میں بیت المقدس کو مسلمانوں کی ملکیت اور اہم ترین تاریخی اور مذہبی مرکز قرار دیا گیا ہے۔
ڈاکٹر سعیدحسن نے بتایا کہ جامعہ الازھر کے زیراہتمام ایک کانفرنس کا اہتمام آج بدھ کےروز قاہرہ میں کیا گیا ہے،جس میں عرب ممالک اور فلسطین سے تعلق رکھنے والے دسیوں شخصیات شرکت کریں گی۔ اس موقع پر جامعہ الازھرکا تیار کردہ” میثاق القدس” پڑھ کر سنایا جائے گا اور اسے باقاعدہ طورپر جامعہ الازھرکے منشور میں شامل کیا جائے گا۔
انہوں نے کہا کہ جامعہ الازھرکا تیار کردہ "میثاق القدس” میں مقبوضہ بیت المقدس کی شرعی اور آئینی حیثیت،اس کی جغرافیائی اہمیت اور شہرکے مذہبی تشخص کی وضاحت کی گئی ہے۔ اعلامیے کہا گیا ہے کہ بیت المقدس مسلمانوں کی ملکیت سرزمین ہے جس پر یہودیوں کا کوئی حق نہیں۔ شہرمیں موجود تمام مقدسات بشمول مسیحی مقدسات کے سب کا تحفظ مسلمانوں اور مسیحی برادری دونوں کی ذمہ داری ہے۔
الازھرالاعلامیے میں عالم اسلام پرزور دیا گیا ہے کہ وہ بیت المقدس کی آزادی اور اس کے تحفظ کے لیے متحد ہو جائیں اورتمام وسائل کو بیت المقدس کا محاصرہ توڑنے پر صرف کریں۔