(فلسطین نیوز۔مرکز اطلاعات) اسرائیلی جیلوں میں طویل بھوک ہڑتال کے باعث عالمی شہرت حاصل کرنے والے صحافی محمد القیق کے ساتھ اظہار یکجہتی کے لیے یورپی ملکوں میں بھی مظاہرے جاری ہیں۔ اس سلسلے میں برطانیہ کے دارالحکومت لندن میں آج جمعرات کو احتجاجی مظاہروں کا اہتمام کیا گیا ہے۔
رپورٹ کے مطابق سماجی کارکنوِں، سول سوسائٹی ، انسانی حقوق کے مندوبین، برطانیہ میں موجود فلسطینی اور عرب کمیونٹی کی جانب سے آج جمعرات کو لندن میں اسرائیلی سفارت خانے کے باہربھی احتجاجی دھرنا دیا جائے گا۔
برطانوی سماجی کارکن اور ’’اولیف‘‘فاؤنڈیشن کی جانب سے بتایا گیا ہے کہ آج اسرائیلی سفارت خانے کے باہر سیکڑوں کی تعداد میں شہری جمع ہو کر اسرائیلی جیل میں بھوک ہڑتال کرنے والے صحافی محمد القیق کے ساتھ اظہار یکجہتی کے لیے مظاہرہ کریں گے۔
خیال رہے کہ محمد القیق فلسطینی صحافی ہیں جہنوں نے اپنی بلا جواز گرفتاری اور انتظامی حراست کے خلاف گذشتہ 87 دن سے مسلسل بھوک ہڑتال جاری رکھی ہوئی ہے۔ حالت تشویشناک ہونے کے باوجود القیق کو فلسطینی اسپتال منتقل کرنے کی درخواست مسترد کردی گئی ہے۔