رپورٹ کے مطابق سوموار کو فلسطین کے علاقے غزہ کی پٹی، مغربی کنارے کے شہروں الخلیل، نابلس، رام للہ اور بیت المقدس میں بھی انسانی حقوق کے مندوبین، سول سوسائٹی اور عام شہریوں نے احتجاجی مظاہروں میں حصہ لیا۔ جگہ جگہ ہونے والے مظاہروں میں شہریوں نے بھوک ہڑتالی صحافی محمد القیق کی تصاویر اور پوسٹر اٹھا رکھے تھے جن پر القیق کے ساتھ یکجہتی اور اس کی فوری رہائی کے مطالبات درج تھے۔
رپورٹ کے مطابق مغربی کنارے کے جنوبی شہر الخلیل میں شاہراہ شہداء پر ایک ریلی نکالی گئی جس میں سیکڑوں شہریوں نے حصہ لیا۔
فلسطین کے علاقے غزہ کی پٹی میں بھی سیاسی اور مذہبی جماعتوں کی اپیل پر القیق کے ساتھ یکجہتی کے لیے ریلیاں نکالی گئیں۔ رام اللہ میں انسانی حقوق کی ایک تنظیم نے اقوام متحدہ کے مندوب کے سامنے القیق کی بھوک ہڑتال کے خاتمے کے مطالبے پر مبنی ایک پٹیشن دائر کی۔ نابلس اور دوسرے شہروں میں بھی القیق کے ساتھ یکجہتی کے مظاہرے ہوئے جن میں بڑی تعداد میں عام شہریوں، صحافی برادری سے وابستہ افراد اور سیاسی کارکنوں نے شرکت کی۔