ایک ہزار سے زائد صہیونیوں کی حضرت یوسف کے مزار کی بے حرمتی

نابلس – (فلسطین نیوز۔مرکز اطلاعات) ایک ہزار سے زائد صہیونی شرپسندوں نے فلسطین کے مقبوضہ مغربی کنارے کے شمالی شہر نابلس کے مشرق میں واقع جلیل القدر پیغمبر حضرت یوسف علیہ السلام کے مزار پر دھاوا بولا اور مذہبی رسومات کی ادائیگی کی آڑ میں مزار کی بے حرمتی کی۔ مزار پر دھاوے کے بعد فلسطینی شہریوں اور صہیونی آباد کاروں کے درمیان جھڑپوں کی اطلاعات ہیں۔

عینی شاہدین کے مطابق آج سوموار سات اگست کو علی الصباح  ایک ہزار سے زائد صہیونی شرپسندوں کے ایک ھجوم نے حضرت یوسف علیہ السلام کے مزار پر دھاوا بولا اور تلمودی تعلیمات کی روشنی میں مذہبی رسومات کی ادائیگی کی آڑ میں مقدس مقام کی بے حرمتی کی۔

فلسطین نیوز کو موصول ہونے والی اطلاعات کے مطابق سیکڑوں صہیونی شرپسند اسرائیلی فوج کی فول پروف سیکیورٹی میں یوسف علیہ السلام کے مزار میں داخل ہوئے اور عبادت کی آڑ میں مقدس مقام کی بے حرمتی کی۔

عینی شاہدین نے بتایا کہ صہیونی آباد کار حضرت یوسف علیہ السلام کے مزار پردھاوے سے قبل حوارہ چوکی پر جمع ہوئے۔ اس کے بعد بیت فوریک  سے سات بسوں کے ذریعے حضرت یوسف علیہ السلام کے مزار پر پہنچے۔اس موقع پر اسرائیلی فوج نے صہیونی شرپسندوں کو فول پروف سیکیورٹی مہیا کر رکھی تھی۔

مزار پر دھاوے کے بعد فلسطینی شہریوں اور صہیونی آباد کاروں میں جھڑپوں کی اطلاعات ہیں۔ دونوں طرف سے ایک دوسرے پر پتھراؤ کیا گیا ہے۔

رپورٹ کے مطابق ایک مقامی شہری محمد حج حسین نے بتایا کہ صہیونی آباد کاروں کی آمد سے قبل اسرائیلی فوج نے مزار سے ملحق دویات خاندان کے مکان میں گھس کر اس کی چھت پر پوزیشنیں سنھبال لیں۔ صہیونی آباد کاروں کے مزار پر دھاوے کے موقع پر اسرائیلی فوج کی طرف سے انہیں فول پروف سیکیورٹی مہیا کی گئی تھی۔