اسرائیلی فوج نے اعلان کیا ہے کہ ہفتے کی شام غزہ کی جانب روانہ عالمی امدادی قافلے میں شامل رضا کار اس کی حفاظت میں ہیں جن سے تفتیش جاری ہے۔ چھ سال سے اسرائیلی محاصرے میں گھرے
اہل غزہ کے ساتھ یک جہتی کے لیے آنے والے عالمی رضا کاروں کو غزہ سے تیس کلومیٹر دور ہی دھر لیا گیا تھا۔
اسرائیلی فوج نے عبرانی ذرائع ابلاغ میں نشر اپنے بیان میں بتایا کہ اہل غزہ سے اظہار یک جہتی کے لیے آنے والے رضا کاروں کی تعداد انیس تھی، مختلف قومیتوں سے تعلق رکھنے والے ان رضا کاروں کو گرفتار کرکے رملہ کی گفعون جیل منتقل کردیا گیا ہے۔ اس جیل میں ان سے تفتیش جاری ہے۔ وزارت داخلہ کے اہلکار بالخصوص ان سے غزہ آنے کی تیاریوں سے متعلق پوچھ رہے ہیں۔
دوسری جانب اسرائیلی پولیس نے زور دے کر کہا ہے کہ اس بحری جہاز پر سوار تین رضا کاروں جن کا تعلق اسرائیل سے ہے سے خصوصی طور پر تفتیش کی جا رہی ہے۔ اسرائیلی حکام ان تینوں کو عدالت میں پیش کرنے کا ارادہ رکھتے ہیں۔
بشکریہ: مرکز اطلاعات فلسطین